Umubiri wa Yanga ugiye kugezwa mu Rwanda

 Umubiri wa Yanga ugiye kugezwa mu Rwanda

Nkusi Thomas wamenyekanye nka “Yanga” mu gusobanura filimi, agiye guherekezwa mu cyubahiro nyuma y’icyumweru kirenga yitabye Imana azize uburwayi yari amaranye iminsi. Yaguye muri Afurika y’Epfo aho yari arwariye.

Nkuko gahunda yatangajwe n’umuryango we ibigaragaza, Yanga witabye Imana ku wa 17 Kanama 2022 azabanza gusezerwaho n’abo muri Afurika y’Epfo kuwa 26 Kanama 2022.

Bukeye bwaho kuwa 27 Kanama 2022 saa moya za mu gitondo nibwo umubiri we uzagezwa i Kigali. Ku cyumweru tariki 28 Kanama 2022 inshuti n’umuryango we bazakora umuhango wo kwizihiza ubuzima bwe uzabera mu Bugesera aho yari atuye.

Biteganyijwe ko Yanga azashyingurwa kuwa Mbere tariki 29 Kanama 2022.

Yanga yari yaragiye muri Afurika y’Epfo muri Mata uyu mwaka, icyo gihe yari ajyanye abana be kugira ngo basure umubyeyi wabo cyane ko ariho akorera. Agezeyo, yaje gufatwa n’uburwayi, araremba biza kurangira yitabye Imana mu gitondo cyo kuwa 17 Kanama 2022.

Yanga yamenyekanye asobanura filime. Yatangiye gusobanura filime afite imyaka 17 ubwo yigaga mu mashuri yisumbuye.

Gusobanura byamuhaye amafaranga ndetse bituma amenyekana kugeza ubwo mu 2012-2013 yaje kubihagarika kuko yabonaga isoko rya filimi zisobanuye ritangiye kugenda nabi.

Mu 2018, Yanga yaje kugira uburwayi bukomeye, arwara ikibyimba ku gifu cyaje kumutera kanseri.

Akimara kumenya ko arwaye gutya, yarihebye bikomeye atangira gushaka abakozi b’Imana ngo bamusengere.

Nyuma y’igihe arwaye kanseri, yaje kuyikira nta muntu umubaze, ahita akomerezaho urugendo rwe rwo gushima Imana, atangira gukora ivugabutumwa. Mu biganiro bye yari amaze igihe atanga yavugaga ashize amanga ko ashimishijwe no kuba yaramenye Imana kandi akaba ayikorera.

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.