Umufasha wa Pasitori Karangwa Eustache Amani yamuritse igitabo kivuga uburyo umugabo we witabye Imana yabaye ‘Umuhamya w’urukundo rw’Imana mu bantu’

 Umufasha wa Pasitori Karangwa Eustache Amani yamuritse igitabo kivuga uburyo umugabo we witabye Imana yabaye ‘Umuhamya w’urukundo rw’Imana mu bantu’

Umufasha wa Pasitori Karangwa Eustache Amani witabye Imana, Madamu Niyonsenga Donatille, yamuritse igitabo kirimo ubuhamya bw’abantu n’amatsinda y’abantu babanye na Pasitori Karangwa Eustache haba mu muryango, mu kazi no mu buzima busanzwe.

Iki gitabo yise ‘Umuhamya w’urukundo rw’Imana mu bantu’ yatangaje ko igitekerezo cyo kucyandika cyakomotse kuri Pasitori Karangwa ariko akitaba Imana kitararangira. Ibi byatumye akomerezaho kucyandika kugira ngo yuse ikivi yasigiwe n’umugabo we.

Ubwo yari mu muhango wo kumurika icyo gitabo ku mugaragaro, Madamu Niyonsenga Donatille yagize ati:

“Iki gitabo ‘Umuhamya w’urukundo mu bantu’ kigamije gufasha abantu kumva no gusobanukirwa aho imigenzo myiza yo kwigomwa, kwitanga no gufasha abandi bikomoka.”

Yakomeje ahamya kandi ko “Ubuzima bwa Pasitori Karangwa Eustache Amani ari icyemezo ndakuka cy’uko gukunda mwene so nk’uko Imana ibidusaba bishoboka kandi ko atari umwihariko wa bamwe, ahubwo bireba abantu bose b’ibihe byose n’ahantu hose.”

Niyonsenga Donatille (hagati) umufasha wa Pasitori Karangwa akaba ari we wanditse iki gitabo

Mu banyacyubahiro bitabiriye uyu muhango harimo Prof.Malonga Pacifique watanze ubuhamya avuga ko Pasitori Karangwa Eustache Amani yamubereye imfura ndetse abera umugisha n’abantu benshi. Yagize ati:

“Icyambere nashimishijwe n’ubwitabire bw’abantu benshi baje kwitabira umuhango wo kumurika iki gitabo, ariko nanone ntabwo byantunguye kuko Pasitori Eustache yari umugabo w’imfura kandi azi no kubana n’abantu bose. Pasitori Karangwa yatubereye umugisha ndetse ibikorwa bye byatubereye urwibutso rwo kumuhoza ku mutima. Nubwo yatabarutse ariko aracyari kumwe natwe.”

Prof.Malonga Pacifique wa gatatu uhereye ibumoso yashimishijwe n’umubare munini w’abitabiriye uyu muhango anahamya ko Pasitori Karangwa Eustache Amani yari imfura

Sheik Ambasaderi Saleh Habimana nawe wari witabiriye uyu muhango yahamije ko “Pasitori Karangwa Eustache Amani yari inshuti ye magara ndetse ko yamwigishije gukunda igihugu no gukunda Nyakubahwa Perezida Paul Kagame. Pasitori Karangwa kandi yamwigishije gukunda abantu b’Imana adafite ivangura rishingiye ku madini.”

Sheik Ambasaderi Saleh Habimana yakomeje avuga ko nubwo Karangwa Eustache Amani yari Pasitori ngo ariko yatangazwaga nuko ari we wamubyutsaga akamwibutsa gusari.

Sheik Ambasaderi Saleh Habimana (uwa 2 uhereye iburyo) yahishyuye ko Pasitori Karangwa Eustache Amani ari we wamwibutsaga gusari

Alice Uwera umwana wa Pasitori Karangwa Eustache Amani yatangaje ko “papa wabo yababereye umubyeyi mwiza wabagaragarizaga urukundo ndetse n’ingero nziza zo gukunda Imana.” Yakomeje ahamya ko ibi byamuhaye imbaraga nawe akaba akiri muri iyo nzira yo gukunda Imana n’abantu bayo.

Umwana wa Pasitori Karangwa Alice Uwera (uwa 3 uhereye iburyo) avuga ko akiri mu Mana neza kuko yabitojwe na se kuva akiri muto

Iki gitabo kigaragaza ko Pasitori Karangwa yerekanye urukundo rw’Imana mu bantu n’imbaraga zo kwitangira abandi, wagisanga ku Itorero ry’Inkuru nziza mu mujyi wa Kigali ndetse no mu yandi masomero yose yo mu madini atandukanye. Mu minsi ya vuba kandi hari kurebwa uko hashyirwaho urubuga rwa Interineti uwifuza iki gitabo azajya anyuraho akakibona.

Abifuza gutera inkunga umwanditsi w’iki gitabo bashobora gutanga amafaranga y’u Rwanda guhera ku bihumbi icumi kuzamura ubundi bakigira ku rukundo rwa Nyakwigendera Pasitori Karangwa Eustache Amani kandi Imana ikanabaha umugisha.

Uwifuza gutera inkunga umwanditsi atanga guhera ku bihumbi icumi agahabwa iki gitabo

Related post

Leave a Reply

Your email address will not be published. Required fields are marked *