Umukobwa abantu bitaga ‘mubi’ ngo ateye ubwoba agiye gukora ubukwe

 Umukobwa abantu bitaga ‘mubi’ ngo ateye ubwoba agiye gukora ubukwe

Ku mbuga nkoranyambaga zitandukanye, cyane cyane ku rubuga rwa WhatsApp, hari gukwirakwizwa ifoto y’umukobwa w’imyaka 46 witwa Nyirantezimana Domitilla,ugiye gukora ubukwe n’umusore witwa Niyindeba Janvier ufite imyaka 33.

Kuba iyi foto yakuwe kuri videwo iri kuri shene ya YouTube yitwa Zaburi Nshya iri gukwirakwizwa, si uko aba bantu batari bakwiriye gukora ubukwe kubera ikinyuranyo cy’imyaka, ahubwo ni uko abantu benshi bumvaga ko uyu mukobwa adashobora kubona umugabo dore ko bavugaga ko mu maso he ari habi kandi hateye ubwoba kubera ubusembwa yahuye nabwo.

Mu kiganiro uyu mwari yagiriye kuri Zaburi Nshya yahamije ko kuba agiye gukora ubukwe Imana yari yarabimubwiye guhera mu mwaka w’2011. Yagize ati:” Najyaga mu byumba by’amasengesho bitandukanye maze bakampanurira ko Imana igiye kunkorera ubukwe ariko nanjye sinari nzi aho bizaturuka. Umuhanuzi wambwira ko Imana igiye kunkorera ubukwe numvaga ko yavangiwe simbyemere, gusa nagiraga undi mutima wo kuvuga ngo reka ntegereze mbonye ibyo Imana yakoreraga abandi.”

Umukunzi we Niyindeba Janvier, nawe uhamya ko ari umukristu, yatangaje ko uyu mukobwa nubwo abantu bavuga ko afite mu maso habi ariko ari we yahisemo. Yagize ati:

“Uyu mukobwa nararebye nsanga ni we unyitaho kurenza abandi bose maze nanjye numva ariwe nkwiriye guhitamo, bityo nareba abandi nkavuga ngo oyaaa. Buriya ndamukunda, ndamukunda cyanee kuko buriya urwo mukunda ntabwo rwagera no kumunzani ngo arubonere ibiro.”

Uyu mukunzi we kandi yahamije ko nubwo bigoranye ko umukobwa uri mu kigero cy’imyaka 46 abyara, ariko Imana yamuhaye isezerano ko bazabyara.

Mu busanzwe Nyirantezimana Domitilla avuga ko yavutse ari umwana nk’abandi nta kibazo namba afite hanyuma mu agize imyaka 25 ku jisho haza agahere bakavuga ko ari indwara yitwa ‘isekera’ ariko baramuvuza biranga. Nyuma y’aho gato ku ijoshi naho haje ikibyimba bacyokeje ahubwo harangirika haza ibiruguya. Ngo ku mubiri we hagiye haza ikibyimba kimwe kimwe kugeza mu maso he n’amaboko hangirika bikomeye.

Mu gusoza iki kiganiro Nyirantezimana yavuze ko Imana ntacyo ivuga ngo gihere, kuko ngo yahereye kera imubwira ko izamwubakira urugo ariko yakwireba akabona nta mugabo wamwemera. Ibi ngo gihamya ni uko mu myaka 46 amaze kuri iyi si nta musore wigeze amukunda nkuko yabyitangarije.

Related post

Leave a Reply

Your email address will not be published.