Umunani bahitanywe n’umwuzure n’insengero zirafungwa

 Umunani bahitanywe n’umwuzure n’insengero zirafungwa

Léonidas MUHIRE

Mu gihugu cya Ositaraliya imvura idasnzwe yateje umwuzure wibasiye agace k’uburasirazuba bw’iki gihugu uhitana ubuzima bw’abantu ndetse insengero, amashuri n’ibindi bikorwa remezo birafungwa ku bwo kurengerwa n’amazi ku buryo bukabije.

Ku wa mbere w’iki cyumweru uduce twinshi two mu mujyi wa gatatu utuwe cyane muri Ositaraliya ari wo Brisbane, uherereye muri leta ya Queensland, umwuzure w’amazi wari warengeye byinshi mu bikorwa remezo nyuma y’imvura idasanzwe yaguye iminsi itatu idahagarara.

Insengero nyinshi, amazu ndetse n’amaduka muri Brisbane no mu nkengero zaho byari byatangiye kurengerwa n’amazi aho abantu umunani bahaburiye ubuzima ndetse n’imitungo itagira ingano irahatikirira.

Abayobozi bavuga ko imitungo ibarirwa mu bihumbi 15 ishobora gutikirira muri uwo mwuzure kuko uruzi rwa Brisbane rwuzuye rukagera ku gasongero k’ahantu h’umurambi bigatuma amazi menshi yuzura akarengera ibyari aho byose.

Abaturage benshi muri ako gace basabwe kwimuka ndetse insengero n’amashuri birahagarara ari nako ababarirwa muri za miliyoni bafite akazi basabwe gukorera mu ngo.Bivugwa ko abantu umunani ari bo bamenyekanye ko bapfiriye muri uyu mwuzure kuva mu cyumweru gishize gusa abandi benshi bataramenyekana umubare baburiwe irengero. Amashusho yagiye hanze ku wa mbere agaragaza ibigo by’amashuri ya za kaminuza zimwe na zimwe zuzuyemo amazi byanatumye ibigo by’amashuri byinshi bihagarika kwigisha muri ako gace harimo na Kaminuza Gatolika ya Ositaraliya yari igiye kwakira abanyeshuri mu gutangira umwaka wayo w’amashuri.

Ibikorwa byihutirwa byo gukora ubutabazi nibyo byemererewe gukomeza gukora muri Queensland mu gihe hagikomeje gushakishwa ababa barahitanywe n’uwo mwuzure no gukora ubundi butabazi kuko n’ubwo imvura yaretse kugwa ariko amazi aracyari menshi. Ejo ku wa mbere, imibare yerekanaga ko ingo zirenga 50.000 zo mu majyepfo ashyira uburasirazuba bwa Queensland byabarurwaga ko nta muriro w’amashanyarazi zifite kubera uwo mwuzure.

Uyu mwuzure wibasiye abaturage bo muri Queensland ndetse no mu majyaruguru ya New South Wales ni wo wari ufite ubukana cyane kuva mu mwaka wa 2011 ubwo imvura nyinshi yamaze ibyumweru byinshi igwa bigatera umwuzure ndetse bigatera n’ibiza byibasiye abantu barenga ibihumbi 200.

Related post

Leave a Reply

Your email address will not be published. Required fields are marked *