Umunyamakuru w’ikiganiro cy’iyobokamana muri RBA yafunguye urubuga rufasha abantu kubona ibyo bakeneye batabanje guhaguruka aho bari

 Umunyamakuru w’ikiganiro cy’iyobokamana muri RBA yafunguye urubuga rufasha abantu kubona ibyo bakeneye batabanje guhaguruka aho bari

Umunyamakuru w’Ikigo cy’Igihugu cy’Itangazamakuru, ukora mu gisata cy’iyobokamana, Patience Ishimwe, yamuritse ku mugaragaro urubuga rwitwa Www.veza.rw ruzajya rufasha abantu batandukanye kubona serivisi zo gukodesha, kubona ibyumba muri hoteli ndetse n’ibindi bifashishije ikoranabuhanga.

Mu kiganiro yagiranye na Nkundagospel yavuze ko urwo rubuga ruje gukemura ikibazo cyo kumara umwanya mure mure umuntu yabuze amakuru ku kintu akeneye. Yagize ati:

“Gukora uru rubuga nabitewe nuko nabonaga bisaba umwanya munini kugira ngo umuntu abone ikintu gikodeshwa cyangwa gikenerwa gusa mu gihe runaka, rimwe na rimwe agatakazamo n’amafranga atari ngombwa. Akenshi usanga agenda mu guhamagara ubaza abantu cyangwa no kwishyura abitwa aba komisiyoneri. Iyi system ifasha guhuza ukeneye services nk’izo n’abazitanga ku buryo bwiza kandi bwihuse.”

Yakomeje agira ati:

“Ni urubuga rubaho gusa serivisi zo gukodesha ibintu bitandukanye, kugeza ubu biri mu byiciro 33 ndetse rugafasha n’abatanga mwene izo serivisi kuzishyiraho ku buryo abazikeneye bazibona byoroshye. Muri make mu cyongereza ni Online Items Listing & Booking/hiring System. Akarusho ni uko gushyiraho serivisi ari ubuntu, gusa twe tugafata 8% by’ayo ukeneye serivisi yishyuye binyuze kuri uru rubuga. Ikindi ni uko uwishyura afite ubushobozi bwo gukoresha serivisi ya Mobile Money ya MTN Rwanda, MPESA, Mobile Money Ghana, akaba ashobora gukoresha amakarita n’ubundi buryo butandukanye.”

Nkuko Patience Ishimwe abihamya, uru rubuga ntaho ruhuriye n’umwuga w’itangazamakuru ahubwo bishamikiye ku mwuga we wo gukora Softwares (Software Engineering). Yagize ati:

“Mu by’ukuri usibye kuba narakuze nkunze ikoranabuhanga nkaza no kuryiga muri Kaminuza, nagize n’ amahirwe nongererwa ubumenyi na Andela, ikigo gikomoka muri Amerika ariko kigakorera no mu Rwanda mu gufasha cyane cyane urubyiruko kuba abanyamwuga mu bijyanye no gukora Softwares, bikaba byose byaramfashije gukora urubuga nk’uru.”
Ni urubuga ubundi kugeza ubu ruri mu bwoko twita web application mu cyongereza ni ukuvuga ko ari urubuga ushobora kugeraho ukoresheje program iyo ari yose yabugenewe.

Patience Ishimwe ni umunyamakuru akaba n’ukora gahunda(softwares) za mudasobwa. Mu mashuri yisumbuye yize Imibare,Ibinyabutabire n’Ibinyabuzima (MCB), muri GS St Philippe Neri, ishuri riri mu Majyepfo mu karere ka Gisagara. Muri Kaminuza yize amasomo ajyanye n’ikoranabuhanga, Information Technology(IT). Muri Kaminuza ya Kigali (University of Kigali).

Patience Ishimwe itangazamakuru arimazemo imyaka ikabakaba 7, kuko yaritangiye mu mwaka wa 2015. Kuva icyo gihe kugeza ubu ari gukorera mu Kigo cy’Igihugu cy’Itangazamakuru (RBA) , akaba abarizwa ku ishami riri i Musanze. Ubundi muri RBA akora mu ishami ry’amakuru, akanakora ikiganiro cy’ikoranabuhanga cyitwa CODE01, n’icya Gospel cyitwa Gospel Image cyigeze no kuba ikiganiro cyiza cya Gospel gica kuri Radio muri Groove Awards ya 2017.

Patience Ishimwe kandi afatanya na bagenzi be gukoro ikiganiro cya mu gitondo cyitwa Umuti ukwiye.

Wayisura unyuze aha: https://www.veza.rw/



Related post

Leave a Reply

Your email address will not be published.