Umuramyi Diana KAMUGISHA agiye kuzenguruka igihugu mu bitaramo bitazishyuza abazitabira

 Umuramyi Diana KAMUGISHA agiye kuzenguruka igihugu mu bitaramo bitazishyuza abazitabira

Umuhanzikazi w’indirimbo zihimbaza Imana, Diana KAMUGISHA wamamaye cyane mu ndirimbo Mwami Mana n’izindi yatangaje ko agiye gukora ibitaramo yise ‘Make His Praise Glorious’ (Muririmbe Icyubahiro cy’Izina Ryayo) Ibi bitaramo bizazenguruka hirya no hino mu Rwanda aho bizabimburirwa n’ikizabera mu Mujyi wa Kigali. Ni ibitaramo kandi uyu muramyi azamurikiramo ikizwi nka ‘Extended Play’ y’indirimbo ze z’ubuhanuzi (Prophetic Songs).

Aganira na InyaRwanda, uyu muhanzikazi, Diana yavuze ko ibi bitaramo bizabimburirwa n’ikizaba ku itariki ya 29 Gicurasi 2022 kibere New Life Bible Church ku Kicukiro. Azafatanyamo n’abandi baramyi batandukanye harimo Alice Toni, GASARO Tracy n’abandi kikazaba cyubakiye ku magambo aboneka mu gitabo cya Zaburi, 66: 2. Nyuma y’ikibimburira ibindi kizabera i Kigali, ibindi bitaramo bizabera mu Ntara z’Igihugu zitandukanye hamamazwa Yesu binyuze mu ndirimbo.

Diana yakomeje avuga ko intego y’ibi bitaramo bye ari ukwamamaza icyubahiro cy’Imana no kuyishimira ku bw’uburinzi bwayo mu gihe cya Covid-19. Ati: “Intego yabyo [ibitaramo] ni ukwamamaza icyubahiro cy’Imana no kuyishima ko yaturinze ikanadukiza Covid-19, n’ubwo itaragenda burundu ariko turayishima aho Igejeje ikora”. Muri ibi bitaramo byose kwinjira bizaba ari ubuntu ku bazitabira bose kugira ngo ubutumwa bwiza bubashe kugera kuri benshi n’abadafite amikoro.


Uyu muramyi Diana yasoje avuga ku imurikwa rya ‘Extended Play’ (EP) ye y’indirmbo z’ubuhanuzi. Cya gitaramo kizabimburira ibindi kuri ‘New Life Bible Church’ ku Kicukuro ni cyo azaririmbamo indirimbo 5 ze ziri kuri EP ye y’ubuhanuzi kandi abazashaka iyi EP bakaba bazayitahana. Iyi EP iriho indirimbo eshanu z’ubuhanuzi ari zo: Nzongera Ndirimbe, Wa Mwaka w’Imbabazi, Party, Psalms 91, na Yahweh (Psalms 33).

Related post

Leave a Reply

Your email address will not be published.