Umuramyi Poly Turikumwe yasohoye indirimbo nshya y’amashimwe

 Umuramyi Poly Turikumwe yasohoye indirimbo nshya y’amashimwe

Umuhanzi nyarwanda uririmba indirimbo zo kuramya no guhimbaza Imana, Poly Turikumwe, yasohoye indirimbo nshya yise “Ugira Neza” yakomotse ku mashimwe y’iminsi mibi Imana yamwambukije, irimo ubukene ndetse n’ibindi byago bitandukanye.

Mu kiganiro yagiranye n’umunyamakuru wa Nkundagospel yagize ati:

“Iyi ndirimbo nayikoze nibutse imirimo y’Imana, ibyo yagiye inkorera mu bihe bitandukanye ariko cyane cyane igihe nari nugarijwe n’ubukene ndetse n’ibyago.Harimo ubutumwa bwo gushima Imana kubw’imirimo yayo itugirira kubwo ubuntu bwayo.”

Muri iyi ndirimbo iryoheye amaso n’amatwi harimo amagambo yo gushima Imana mu iteraniro kubwo ibitangaza yakoze. Batangira baririmba bati:

“Imbere y’iteraniro, imbere y’imbaga nini y’abantu nzavuga yuko ugira neza. Imirimo wankoreye wankuye aho njye ntari kwivana ndemeza yuko ugira neza.” Bakomeza baririmba bati:

“Jehovah wee, Jehovah Mana ikomeye ugira neza bugacya bukira, imbabazi zawe ungirira hari ubwo mbona ntazikwiye, wankunze urukundo ruhoraho uragahoraho.”

Poly Turikumwe ni umuramyi ukorera umurimo w’Imana mu mujyi wa Musanze, mu itorero Zion Temple ariko ahamya ko aho Imana imutumye hose ajya kuhakorera umurimo atiganda.

Yatangiye kuririmba kuva akiri muto mu ishuri ryo ku cyumweru ariko aza kwinjira mu munzu itunganya indirimbo mu mwaka wa 2018. Uyu muhanzi umaze gukora indirimbo 6 afite intumbero yo gukora indirimbo zigera kure zigahimbaza Imana zikanafasha imitima y’abantu.

Amajwi y’iyi ndirimbo yakorewe muri studio yitwa 3 Blessings, ikorwa na Leon Pro, mu gihe amashusho yo yakozwe na Herve Graphy studio.

Kanda hano urebe iyi ndirimbo

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.