Umushumba wa Kiliziya yagereranyije intambara na Jenoside yakorewe Abatutsi ubwo yasobanuraga uko yangiwe kujya i Moscow

 Umushumba wa Kiliziya yagereranyije intambara na Jenoside yakorewe Abatutsi ubwo yasobanuraga uko yangiwe kujya i Moscow

Nyirubutungane Papa Francis uyobora Kiliziya Gatolika ku isi, yatangaje uko ibintu bimeze ubu muri Ukraine ari nka Jenoside yakorewe Abatutsi mu Rwanda gusa ko hashize igihe asabye ariko ataremererwa na Perezida Putin ko bahurira i Moscow mu Burusiya ngo baganire ku kibazo k’intambara imaze amezi arenga abiri ica ibintu muri Ukraine.

Mu kiganiro yagiranye n’ikinyamakuru cyo mu Butaliyani kitwa Corriere della Sera kuri uyu wa 3 Gicurasi 2022 Papa Francis yavuze ko atabona impamvu yo kujya i Kyiv muri Ukraine kuko yoherejeyo intumwa ebyiri ahubwo ko agihanze amaso ubusabe yoherereje Perezida Putin ngo arebe ko yafungura imiryango. I Moscow Papa yoherejeyo umunyamabanga wa Leta Karidinali Pietro Parolin mu minsi 20 y’intambara ngo ashyire Perezida w’u Burusiya ubusabe bw’uko yiteguye kumusanga i Moscow ngo baganire ku ntambara gusa nta gisubizo yamuhaye.
Yagize ati: “Ntago twigeze tubona igisubizo kandi turacyabyifuza n’ubwo bwose mfite ubwoba ko Putin adashobora kandi adashaka ko duhura muri iki gihe”.

Papa yibukije ko nyuma y’aho u Burusiya bugabye ibitero simusiga kuri Ukraine ku ya 24 Gashyantare yavuganye na perezida wa Ukraine, Volodymyr Zelenskyy kuri telefoni
ndetse ko bukeye bwaho ku ya 25 Gashyantare yagiye kuri ambasade y’u Burusiya akabasaba kumusobanurira no guhagarika intambara ariko atahamagaye prerezida Putin mu gihe yari ahari.

Muri icyo kiganiro kandi Papa Francis yagereranyije uko ibintu byifashe muri Ukraine n’igihe cya Jenoside yakorewe Abatutsi mu Rwanda mu w’1994.


Ati: “Ariko se ubugome bukabije kuki mudashobora kubuhagarika? Mu myaka 25 ishize kimwe no mu Rwanda twanyuze mu bisa n’ibi”.

Papa Francis yasoje avuga ku kiganiro yagiranye mu buryo bw’ikoranabuhungu n’Umuyobozi w’idini Orthodox ry’u Burusiya muri Werurwe. Yavuze yamusabye kumusobanurira na we akamutega amatwi gusa ko ibyo uwo muyobozi yamubwiye atumvishemo impamvu nyayo yatuma intambara iba. Ati: “Namuteze amatwi ndamubwira nti ‘nta kintu na kimwe nsobanukiwe muri ibyo. Muvandimwe, ntago turi abanyamadini ba leta, ntidushobora gukoresha imvugo ya politiki, ahubwo rugomba kuba ururimi rwa Yezu. Turi abungeri b’abantu bamwe bera b’Imana. Niyo mpamvu tugomba gushaka inzira z’amahoro, kugira ngo duhagarike umuriro w’intwaro’’.

Related post

Leave a Reply

Your email address will not be published.