Urusengero rwa ADEPR Base rwari rukiri rushyashya rurasenyutse kubera impanuka

 Urusengero rwa ADEPR Base rwari rukiri rushyashya rurasenyutse kubera impanuka

Urusengero rwa ADEPR Base, Paruwasi ya Tumba, ururembo rwa Gicumbi, ho mu Karere ka Rulindo rumaze gusenyuka nyuma yo kugongwa n’imodoka yo mu bwoko bw’ikamyo ariko Imana ikinga ukuboko ntihagira uhasiga ubuzima.

Ubwo umunyamakuru wa Nkunda Gospel yageraga ahabereye iyo mpanuka yasanze imodoka ifite pulaki ya RAF 609 C yangiritse bikomeye, umushoferi yakomeretse ndetse n’urusengero rwaguye hasi, ikigega kibamo amazi meza nacyo cyamenaguritse.

Andi makuru Nkunda Gospel ifitiye gihamya nuko iyi mpanuka ibaye nta minota icumi irashira abakorerabushake bakoraga isuku muri urwo rusengero kugira ngo amasengesho y’ejo ku cyumweru agende neza, basohotse muri urwo rusengero.

Twagerageje kuvugana na Pasiteri Isaie Ndayizeye , umushumba mukuru w’itorero rya ADEPR ngo agire icyo abwira abakristu bahasengeraga bibaza uko bagiye kubyifatamo ariko ku murongo wa telefoni atubwira ko atamenye iby’aya makuru kuko yari mu nama adakoresha neza telefoni ye ariko adutangariza ko agiye kubikurikirana.

Uru rusengero rwari rumwe mu nsengero zubatse neza mu Karere ka Rulindo ndetse ntirwari rwakarangiye neza, dore ko abakristu bari mubwitange kugira ngo bashyiremo amakaro yari asigaye kuko igice kini cyari cyaramaze kurangira.

Ibisa bitya biherutse kuba no mu Karere ka Huye aho abantu babiri basize ubuzima mu mpanuka yabaye ubwo urusengero rwa ADEPR Kibingo ruherereye mu Murenge wa Karama mu Karere ka Huye rwagwiraga abantu15 barugiyemo bashaka kugama imvura.

Uwari utwaye iyo modoka nawe yakomeretse gusa bidakabije

Related post

Leave a Reply

Your email address will not be published.