Vedaste N. Christian yahishuye ahashibutse indirimbo “Uzi gukunda” yasohoreye amashusho.

 Vedaste N. Christian yahishuye ahashibutse indirimbo “Uzi gukunda” yasohoreye amashusho.

“Iyi ndirimbo nayihimbiye mu muhanda, bari bagiye no kungonga natwawe.”

Umuramyi Niyondora Vedaste Christian uzwi nka Vedaste N. Christian yasohoye amashusho y’indirimbo ye “Uzi gukunda” yakunzwe na benshi, ahishura aho yashibutse n’uburyo yamubereye imbarutso yo gukora izindi ndirimbo zayikurikiye.

Indirimbo “Uzi gukunda” ni yo ndirimbo ya mbere Vedaste N. Christian yasohoye nk’umuhanzi ku giti cye, kuko ngo yabanje kuba umuhanzi kera ageraho arabireka ajya muri korari, “Uzi gukunda” rero ngo niyo yabaye iya mbere kuva aho yongeye kuririmba ku giti cye.

Iyi ndirimbo ngo yakiriwe neza n’abantu bose bayumvise, yakoze ku mitima y’abatari bake, hari n’abagiye bahamya ko iyi ndirimbo bayiruhukiyemo ibyari bibaremereye, abandi ibomora imitima.

Umuhanzi Vedaste N. Christian yavuze ko iyi ndirimbo yayihimbye ari mu nzira agenda, icyo gihe ngo “bari bagiye no kungonga natwawe.”

Icyo gihe ngo yibutse inshuti ze yagiye atakaza bivuye ku makosa ye cyangwa yazo, yibuka uko bahuye ntacyo bibasabye ariko kugumana bikabananira, asanga abantu bahora babeshyana urukundo Yesu ari we ukunda byuzuye.

yagize ati “Mbihuza n’ukuntu Yesu byamugoye kuturonka kugeza aho amena amaraso akabambwa akanapfa, ndeba amafuti tugira n’ukuntu tumuhemukira akaba akitwita inshuti nta na gahunda afite yo gutana natwe, mu by’ukuri Yesu twamubereye babi mu rukundo ariko nta gahunda ya gatanya yagize”

“Nguko uko numvishe indirimbo imanutse nshyira telefone ku munwa ngenda ndikodinga amarira ashoka nisanga hagati muri kaburimbo ndi kuririmba imodoka zahagaze meze nk’uwasaze.”

Ubwo yari akiva mu muhanda icyo gihe ngo yahise ahura n’umuntu w’inshuti ye (Egide Bizima), ni we wahise amufata ukuboko ngo bajye muri studio gukora iyo ndirimbo aramubwira ati “Ibi bintu ubitse si ibyawe.”

Icyo gihe ngo nta n’amafaranga bari bafite bombi bagize amahirwe prioducer abemerera kuyibakorera ku buntu (yakozwe na Higiro Bruce), urugendo rwo kuyikora kugeza irangiye narwo ngo ntirwari rworoshye kuko byamusabaga kugenda n’amaguru ajya kuri studio.

Ati “Navaga aho ntuye (i Murambi, Gatenga) nkajya kuri Studio Kibagabaga n’amaguru, kandi twakoraga nijoro producer avuye mu kazi. Nageraga mu rugo bwneda gucya, ariko mbiziranyeho na Madame gusa, abandi narabibahishaga.”

Christian yavuze ko n’ubwo iyi ndirimbo yayikoze mu bihe bitamworoheye, ariko ngo yamubereye umugisha cyane, yatumye yunguka inshuti nyinshi, ndetse inamubera ikiraro cyo gutuma ahita akomerezaho akora n’izindi zitandukanye.

Uretse aya mashusho y’iyi ndirimbo  vedaste N. Christian asohoye, ngo arateganya gukomeza gukora izindi ndirimbo nshya, ndetse no gusohora amashusho ya zimwe harimo n’iza kera.

REBA INDIRIMBO “Uzi Gukunda” hano:

Indirimbo Uzi gukunda ngo yabereye Vedaste ikiraro cyo kunyuzamo n’izindi.

Related post

Leave a Reply

Your email address will not be published. Required fields are marked *