Yakoranye na Bosebabireba! Mr Kagame yasohoye album afata nka ‘Goligota’ Yesu yabambweho

 Yakoranye na Bosebabireba! Mr Kagame yasohoye album afata nka ‘Goligota’ Yesu yabambweho

Eric Mabano Kagame wamenyekanye mu muziki nka Mr Kagame yashyize hanze album ye ya mbere yise ‘Goligota’ yahurijeho abahanzi batandukanye bakomeye mu Rwanda.

Iyi album iriho indirimbo 10. Zirimo izo yahuriyemo n’abahanzi nka Theo Bosebabireba, Ariel Wayz, Cally, Herbert Skillz, DJ Marnaud na Nessa. Iyi album iriho indirimbo zitandukanye nka Bwombo, Mukunzi, Kiliziya, Akanini k’icumi n’izindi.

Indirimbo z’uyu muhanzi ziri kuri iyi album zirimo ubutumwa butandukanye. Nk’iyitwa ‘Kigali’ igaruka ku buzima bwa Kigali bw’ukuntu abantu babaho mu buzima busa nk’aho bworoshye umuntu abarebeye inyuma ariko imbere barashize.

Iyi ndirimbo yahuriyemo na Ariel Wayz, hari aho avuga ko abantu biha abahanzi bakora ibishegu nyamara badashobora kubafasha cyangwa baririmba indirimbo zirimo ubutumwa ntibabyiteho.

Ati “Nazanye iyitwa ‘Ntiza’ baravuga ngo ni igishegu nsohoye iyitwa ‘Amadeni’ bati uyu muhungu ni umusazi. Nibyo koko ndamaze ndi umusizi niko kazi, wize umuziki ryari ni gute uncira urubanza? Ese nguhe ubutumwa uzabutanga koko, uzabuvuga mu bahungu maze kurya inkoko cyangwa uzabukunda ubushyire kuri Twitter.”

Izindi ndirimbo ziriho ziganjemo iziganisha ku rukundo. Indi iriho ifite aho itandukaniye n’izindi n’iyo yahuriyemo na Bosebabireba basubiyemo yitwa ‘Mukunzi’ y’uyu muhanzi Bosebabireba ni umunyabigwi.

Iyi ndirimbo isanzwe ari iya Bosebabireba igaruka ku gushimira Imana. Mr Kagame avuga ko ibyo aririmbamo ari inkuru mpamo y’ibyigeze kumubaho ariko akavuga ko nta kindi yarenza ku byo yaririmbye muri iyi ndirimbo.

Ati “Indirimbo twahuriyemo irimo inkuru nyayo yambayeho.” Akomeza avuga ko uyu muhanzi atigeze amurushya amusaba ko bakorana.

Mu gitero cy’uyu muhanzi hari aho araririmba ati “Burya mu 2020, mba ngeze Kimironko nari ngumyeyo nzira amafuti, nyagasani wambereye ishumi[inshuti] […] nari nshyinjwa gukoma[gusambana] ngo Mabano afashe ku ngufu nyagasani wandinze urupfu. Mukunzi mwiza nziko unyumva akira iri shimwe ngushimiye.”

Mu kiganiro na IGIHE Mr Kagame yavuze iyi album yayigereranyije na Goligota ivugwa muri Bibiliya igaragaza aho Yesu yabambiwe, ubuzima bwa benshi bukarokoka avuga ko nayo igiye kumuhindurira ubuzima.

Ati “Nabigereranyijje na Goligota. Urabona muri Bibiliya bavuga ko Goligota aho Yesu yabambiwe kugira ngo dukizwe ibicumuro byacu. Nanjye iyi album nicyo gitambo cy’umuziki wanjye, kizatuma ntera imbere.”

Yavuze ko kuba yari amaze igihe kinini mu muziki nta album ari uko yari yarahisemo kujya akora indirimbo imwe imwe. Ati “Nashakaga gukomeza gushyira hanze indirimbo imwe imwe. Igihe cyari iki.”

Mr Kagame yamenyekanye guhera mu 2014 mu bihangano bitandukanye ‘Ntimubimbaze’, ‘Mpa power’, ‘Kagirinkuru’, ‘Amadeni’, ‘Shakira ahandi’, ‘Bella’ n’izindi.

Related post

Leave a Reply

Your email address will not be published. Required fields are marked *