Zabron Ndikumukiza yakebuye abantu bafata ubuntu bw’Imana nk’icyangombwa cyo gukora ibyaha

 Zabron Ndikumukiza yakebuye abantu bafata ubuntu bw’Imana nk’icyangombwa cyo gukora ibyaha



Umuramyi nyarwanda Zabron Ndikumukiza, ubarizwa muri Leta Zunze Ubumwe za Amerika, yasohoye indirimbo ye ya kabiri ‘Ubuntu bw’Imana’ yasohokanye n’amashusho, ivuga agaciro k’ubuntu bw’Imana twagiriwe ariko kandi inakebura abitwaza ubwo buntu bagakora ibyaha.

Ubwo yabazwaga ubutumwa nyamukuru bukubiye muri iki gihangano, uyu muramyi yagize ati:

“Ubutumwa buri muri iyi ndirimbo bugenewe abantu bose kugira ngo twibukiranye agaciro k’ubuntu bw’Imana twahawe kugira ngo tubone ubugingo bw’Imana. Kandi ubu butumwa bugenewe n’abantu bafata ubuntu bw’Imana nk’icyangombwa cyo gukora ibyaha “ngo kuko bababariwe byararangiye”, nyamara amaraso y’igiciro gikomeye y’umwana w’Imana utagira inenge yaramenetse kugira ngo tubone ubugingo buhoraho, ubuntu bufite agaciro gakomeye cyane ku buryo atari ikintu cyo gupfusha ubusa.”

Uyu muramyi yakomeje agira ati: “Indirimbo ikubiyemo “gukomera k’ubuntu bw’Imana bubonerwa muri Yesu Kristo ku bwo kwizera, kandi ku bwo gutsindishirizwa n’ubuntu, twahinduwe abana b’Imana ihoraho ku bw’urukundo rutagira akagero Imana yadukunze. Ntibyavuye kuri twe ahubwo ni impano y’Imana y’agaciro. Nkivuga agaciro k’ubuntu bw’Imana, nkuko tubisanga muri Tito 2 : 12 ; Ubuntu bw’Imana buhesha agakiza abantu bose, butwigisha gukiranuka no kumvira Imana mugihe cya none”.

Zabron ni umuramyi wamenyekanye cyane mu matsinda n’amakorali yo mu Rwanda aho twavugamo Korari Nyota ya Alfagili, Agakiza Worship team, New Melody Rwanda n’andi matsinda anyuranye. Mu mpera z’umwaka wa 2021 ni bwo yatangiye kuririmba ku giti cye asohora indirimbo yambere yise ‘Ntuhinduka’ ivuga kudahinduka kw’Imana. Kuri ubu yamaze gushyira hanze indirimbo nshya ikaba n’indirimbo ye ya kabiri. Ni indirimbo yise ‘Ubuntu bw’Imana’, ikaba ivuga ku gukomera k’ubuntu bw’Imana bubonerwa muri Yesu Kristo ku bwo kwizera.

Related post

Leave a Reply

Your email address will not be published.